„Up Theelachts Wohlfahrt!“

An Fredag, de 25. September 26, hett de Theelacht to Nörden to en besünner Geböhrnis in de Theelkamer unner dat Olle Raadhuus nöögt. En neje Theelbook wurr vörstellt.
Un so is dat daarto komen: In Verloop van dat verleden Jahr riepde de Idee, en Theelbook heruttogeven, in dat de Akteuren van de Theelacht, Arvburen un Koopburen, Theelachters un Syndicus berichten sullen, wat de olle Genotenskupp hör bedüdd, wo se an de Theelacht komen sünd un wat hör beröhrt, wenn se an de Theelacht denken of in de Theelkamer komen. HHB hett dat maal in ’t Fernsehn so formuleert: „Mi is, as stappde ik in en Blaas van Histoorje.“
Over de lange Wintermaanten hebben 20 Interessenten Texten upschreven, daarvan söven Schrievers mit twee of mehr Texten. Well neet so faken Platt schrifft, leggt sien Gedachten meest phonetisk daal, dat heet schreven as höört of schreven as sproken. So was dat natürelk nödig, de Texten nipp un nau dörtokieken un in de rechte Schrievwies to brengen. Dat gung blot in en Team. Karl-Heinz Dirks ut Emden un Manfred Briese ut Esens, beid olle Mesters un an sükse Doon wennt, hebben dat Wark verbetert, HHB hett dat tosamenstellt und Dirks hett dat Layout besörgt.
De Texten kwammen na dat Alphabet van Reiner Albers, Holger Alts, HHB, Manfred Briese, Hermann Dirksen, Wilfried Ehrhardt, Remmmer Hedemann, Erich Kleen, Remmer Kruse, Gero Meinen, Theo Peters, Enno Remmers, Hans-Gerhard Seeba, Dietmar Spekker un Frank Ulrichs. Daarto noch en Upsatz van Karlheinz Julius ut sien Biographie, Carl-Heinz Dirks mit Texten as Gast. Hans-Günter Rühaak sien Bidrag sünd de Fotos.
To danken is de Landraad Olaf Meinen un de Landskupps-Präsident Rico Mecklenburg för besünner Kumpelmenten.
In ’t Geheel kwammen 53 Texten binanner. Plattdüüts bi de Theelacht, dat hett en staffolle Achtergrund:
Lang bevör dat de Internationale Institutionen sük um de Schuul van de Lüttje Spraken bekümmern deen, gung dat för de Theelacht to Nörden al daarum, de Oostfreeske Taal bi elke Gelegenheid futttohelpen.
As de Europäiske Charta van de Regionaal – of Lüttje Spraken (SEV Nr. 148) an de 1. Määrtmaand 1998 in Kracht kwamm, was dat oostfreeske Platt al lang de Plichtspraak in de Theelkamer unner dat Olle Raadhuus to Nörden. Prootde daar een Hoogdüüts, wurr he wat scheev ankeken.
Unnerdes is in Sünnerheid Ooostfreesland van de oostfreeske Landskupp ut mit en Nett van Plattdüüts-Beraders overtrucken. De stahn praat, sull Hülp bi Platt nödig wesen.
De Theelacht pleegt al siet Jahren bi de Utgavens un Ofrekens de olle Wennst, wenn de Formalien daan sünd, wat in Platt vör dat open Heerdfüür hören to laten – Geschichten un Gedichten, Vertellsels un Balladen, Dööntjes un Riemsels. Arvburen un Koopburen lesen Texten vör, ut de egen Feer of van anner oostfreeske Schrieverslüü, hen un weerdenn ok maal, wat se van dat Hoogdüütse of anner Spraken overdragen hebben.
Mit Recht word mit disse Gewohn de Theelkamer as „Hort van de oostfreeske Taal“ betekent.
Na dit Vörbild is dat to de Titel van dat Theelbook komen: „Up Theelachts Wohlfahrt! – De Theelacht to Nörden, en Stee van Stöön un Stütt för de ooastfreeske Taal“

Hans-Hermann Briese