En Anspraak anstee van en Bericht

Geachte Heren van Oll Börgerlannen un Leegemoor! De ollste Genotenskupp  van Nörden seggt de tweedollste un de dardollste en hartlik Willkomen. De Theelacht to Nörden begrött de Oll Börgerlannen und de Leegmoor-Gesellskupp heel van Harten in de Theelkamer unner dat Olle Raadhuus. De Theelacht hett van ’t Jahr nöögt – un is blied, dat Ji all komen sünd. Wi wünsken Jo un uns en paar kommodige Stünnen. Dat Ji good un seker to Sitten komen, hebben wi in Septembermaant neje Stohlen för Jo besörgt. An de Koopburen-Tafel harren wi ja vör en paar Jahren neje Stohlwark köfft. Nu wassen de Stohlen an de Arvburen-Tafel of un to ersetten. Ok Syndicus, Theelachters un Stadtdener hebben neje Hörnstohlen kregen. Natürelk harren wi vördeem verschillen Modellen to Proov hier. As dat fienste Achterenn hett sük dat van Theelachter Remmer Hedemann wesen, de dat Wark mit gesloten Ogen angung. Nu sünd wi daar düchtig tofree mit un wi hopen, dat Ji dat ok sünd. Neje Stohlen, smakelk Theelbeer un wat to Snabuleren un to Smöken, dat mag Jo woll behagen. Theelbaad Theo Peters hett weer all bestens bestellt. Hum is to danken. Wat gifft dat anners to berichten? Eerstmaals hett de Theelacht sük van ’t Jahr an „Septembermaant is Plattdüütsmaant“ bedeligt. In de Theelkammer gaff dat en Lesen to dat Thema „Leevde, Last un Lüst“. Wi sünd en paar mehr Tohörers verwachten west. An 25. September hebben wi en neje Theelachts-Book vörstellt. In Verlopp van dat verleden Jahr hebben wi de Interessenten fraggt, of se wat upschrieven, wo se an de Theelacht komen sünd, wat hör in de Sinn kummt, stappen se in de Theelkamer, of wat se spören, sitten se bi de Utgaven. Van 21 Autoren sünd Texten komen. In ’t Geheel sünd over de lange Wintermaanten 53 Texten binannerkomen. Illustreert mit Fotos van Hansi Rühaak is dat en moje Book worden. Dat funnen ok Landraad Meinen, de sien Vertreder Hilko Gerdes stüürt harr, un Präsident van de Oostfreeske Landskupp Rico Mecklenbörg. Beid hebben se en Gröötwoord för dat Book bistüürt. Schaa, dat van de Süster-Gesellskuppen nix komen is. Man in en besünner Kapitel geiht dat ok um G3.

 Dree Süsters

So as in Nörden dree Süsters stahn,

un stahn un stahn, neet unnergahn,

Husen an d’ Markt an de Südersied,

Tügen van Stadt Nörden dör lange Tied,

so gifft dat dree Süsters in Nörden ok,

de hebben hör Stee in ’t Histoorjenbook,

de Theelacht, de Ollste, mehr as elvhunnert Jahr,

de steiht de olle Gesellskuppen vör.

Denn komen de Süsters van ’t Leegemoor,

beter de Bröörs, dat klingt frünnelk in ’t Ohr;

denn sünd Oll Börgerlannen dran,

ok daar keen Froolüü, dat Seggen hett d’ Mann.

Un doch is dat Glieknis van de Süsters wat weert,

Dat Glieknis is ok vandaag neet verkehrt:

De Dree doon sük achten un estimeren,

un nüms deit de Ehr de anner verwehren.

Se hebb’n wat to beden, stahn fast up de Grund,

sünd na Hunnerte Jahren noch munter un sund.

Na buten un binnen hollen se still tosamen,

de een lett up de anner heel ’n daal nix komen.

Se willen as de dree Süsters an d’ Nörder Markt

tosamenstahn, dat stadig een för de anner warkt

mit Ehr un mit Acht, so as sük dat höört,

alltied korrekt, as ’t na de olle Wennst geböhrt.

Up Theelachts Wohlfahrt! Up Oll Börgerlannens Wohlfahrt! Up Leegmoors Wohlfahrt!

HHB