De Chronist wunnert sük. He schrifft siet 25 jahr over dat Doon un Laten van de Theelacht to Nörden.. Wassen de Vörjahrs-Utgaven fröher meest neet so good besöcht, so is de Kamer siet en paar Jahren vull. All Anschien na sitt en Magneet in Theelachts gode Stuuv.

51 Mannlüü satten in de Kamer unner dat Oll Raadhuus, vertellden sük wat, drunken lecker Theel-Beer un smöökden lange Piepen. Dat Heerdfüür brannde, un de Stadtdener up sien Höörnstohl tegen dat Füür harr Sweet unner d’ Tung.

Theelbaad Peters harr de Kamer weer best up Stee un leet neet na, de Arvburen un Koopburen hör Wünsken van de Ogen oftolesen. De Interessenten kwammen an de Tafel un böhrden hör Geld, een Euro per Andeel.

Utgeven wurr de Gaster Theel dör Theelachter Heiko Campen, de Linteler Theel dör Theelachter Dr. Hans-Hermann Briese, de Eber Theel dör Theelachter Remmer Hedemann un de Hover Theel dör de neje Theelachter Hans-Günter Rühaak.

Tüskenin was de „Merchandising-Ofdelen“ an ’t Warken. Well noch keen harr, kunn Slipsen, Ansteeknadels för ’t Revers, all mit dat Theelacht-Wapen d’rup, Boken un utrangeert holten Beerbekers kopen.

Ok de Süstergesellskuppen gaffen sük de Ehr un funnen dat Beer un de besünner Stimmung in de Kamer allerbest, so as de Veerten kund deen, Johann Hatterman van de Oll Börgerlannen und Peter Lütkehus van Leegemoor.

De Arbeiden an dat Theel-Book lopen good; van 14 Schrievers liggen 29 Texten vör, un elv hebben sük noch angeven, Texten to schrieven.

Syndicus Holger Alts leet de Mannlüü weten, wat all geböhrt is in dat verleden Jahr.

2026 will de Theelacht tot eerste Maal deelnehmen bi de Aktion „Septembermaant is Plattdüütsmaant“. Briese leest denn in de Theelkamer egen Texten to dat Thema „Leevde, Last un Lüst“ un Susanne Feith ut Holtgast spöölt daarto up dat Akkordeon.

Vör dat open Heerdfüür drogen Wilfried Ehrhardt, Stadtdener Harald Saathoof un Briese Texten vör. All weten unnerdes: De Theelacht is de „Stee van Stöön un Stütt för de oostfreeske Taal.“

Up Theelachts Wohlfahrt!

HHB