In de Theelacht arven de Koopburen na dat Börger-Recht. So könen för de enkelte Koopbuur dree Vördel of söven Achtel herutkomen. Man blot de bearvte Mannlüü düren Geld böhren, un denn ok blot hele Andelen. So worden bi twee un fiev Sesstel Andelen blot twee Euro utbetahlt.

Bi de Arvburen gellt dat Jungsten-Arvrecht, as dat al bi de Germanen olle Wennst was. Man de ollste Söhn kann up sien Vader sien Rechten antasten. Dat kann ok angahn, dat de Rechten over een of mehr Generationen verschütt gahn sünd; denn kann en Interessent up sien (Ur-Ur-)Grootvader sien Rechten antasten.

Dat geiht so: Is Vörjahrs- of Harvst-Utgaav. De Theelbood kloppt mit de Klopper dree Maal up un röppt: „Höört to, Ji Arvburen. Is wat vörtostellen? Max Mustermann hett sük bi mi angeven un begehrt, up sien Grootvader Willm Mustermann sien Rechten in de Ekeler un Linteler Theelen as en Arvbuur antotasten. Nu steiht dat in de Arvburen hör Erkenntnis, of se hum as en Arvbuur annehmen willen of neet. Nörden, de (upfolgend dat Datum).

All Arvburen up de Deel!“

De Arvburen versammeln sük in Halvkring um dat open Heerdfüür. De Theelachter hett dat Leit van de Zermonie, de de upropen Theelen unner sük hett. He fraggt nu in de Runn na För un Tegen. Klamm word dat tomeest, wenn een weten will, of de Kandidaat ok wat van Eiden un Plogen versteiht. Ia ja so, dat blot noch minn Arvburen in en Buurderee hör Utkomen verdenen. Gottloff sünd twee Tügen benöömt, de de Kandidaat ut de Bedrullje helpen.

Is de Bewarver in de Kring van de Arvburen upnohmen, mutt he wubbeln. Wat he neet weet, is, dat de Wubbel an all Sieden sess Ogen wiest, mit de he bi dree Maal

 – o Wunner! – achtteihn Ogen wubbelt. Nu mutt he achtteihn Beker Theelbeer drinken. Dat will he woll, man kann dat neet. Anstee van Drinken mutt he sük freeikopen.

Nu sall he sük dankbaar tegen de Arvburen wiesen un elk en Beker Theelbeer ut de tinnern Kannen ingeten. Dat deit he mit blote Kopp. „Entblößten Hauptes“ stammt noch ut de Tied, as de Theelkamer winters düchtig kold was, un de Buren in Mantel un Hood up Kopp an de Tafel satten. De olle Regels beseggen ok, „Stock höört bi d’ Döör“, waar egens en Nische in de Wand inlaten is, dat keen Malöör mit tovööl Starkbeer in ’t Blood geböhren kunn.

De Bewarver is nu Neeibuur un kriggt in dat eerste Jahr keen Andelen utbetahlt, man dürt so lang as he mag an de Tafel van de Arvburen sitten gahn.

 

Hans-Hermann Briese 25.12.2025