Gifft nix Mojers as en Theelkamer vull van Mannlüü, all leev un liedsaam, keen Schandaal. De Utgaven an Middeweek, de 10., un Fredag, de 12. Dezember 25, lepen vull van Harmonie un Enigheid of.

Middeweek gaffen Theelachter Heiko Campen un Theelachter Hans-Günter Rühaak för de Neeigroder un Trimser Theelen ut, un Fredag Theelachter Dr. Hans-Hermann Briese un Theelachter Remmer Hedemann för de Ekeler un Oosthover Theelen.

De Theelkamer was ton Barsten vull un de dunker Stimmen brochen de Lücht to Wappen. Theelbeer un Teback ut de lange Piepen smoken de Mannlüü allerbest. Theelbood Theo Peters harr weer all best up Stee un düchtig to doon, dat dat Natt neet utgung.

Ok de Veerten van de Süster-Genotenskuppen harren sük up Padd maakt un prootden van sovööl Bliedskupp bi de Theelacht. Landraad Olaf Meinen see sogaar, dat hum nix over de Harvst-Utgaav bi de Theelacht gung. Wenn ’t eets angahn kunn, much geern weerkomen, ok nadat he sien Amt in Oktober 2026 ofgeven harr.

För de Stadt Nörden was Hayo Wiebersiek komen, de Vertreder van de Börgmester. Un ok de Overdiek- un sielrichter Rainer Mellies gaff sük de Ehr.

Syndicus Holger Alts leet dat Jahr noch maal in Woorden-Biller vörbitrecken.

Buten de Utgaven in Vörjahr un Harvst was ja heel besünners vööl in dat Jahr 2025 geböhrt. In Jannewaar wurr dat Book mit de Huuswapens van de Theelachts-Familien vörstellt. In Määrtmaand is Campen na 50 Jahr as Theelachter in golden Schrift up de Ehrentafel komen. Sied Oktober-Maand is de neje Theelachter Rühaak daar indragen. In Oktober was ’t ok, as de dree olle Genotenskuppen (G3) sük in de Theelkamer truffen. Un Theelachter Briese deit sien Wark 25 Jahr. Daarför wurr he ehrt, ok in schreven Schrift van Börgmester Florian Eiben. Theo Peters is siet 15 Jahr mit Fliet Theelbood. As Dank kreeg he en dönnernde Tafelkloppen.

An Fredag was weer Antasten anseggt. Alexander Arkona harr sük bbi de Theelacht angeven un begehrt, up sien Grootvader Dr. Hermann Arkona sien Rechten antotasten. Sien Vader was körtens ut de Tied fallen. Alexander was heel van Leibzig anreisen komen.

Nu heetde dat: „All Arvburen up de Deel“, un de sullen unnerfinnen, of se hum as en Arvbuur annehmen willen of neet. De Arvburen meenden, he was en komplete Keerl. Daarup muss Alexander wubbeln. Dree maal sess kreeg he binanner. Dat bedüüdte, he muss 18 Bekers Beer drinken. Dat wull he woll, man kunn dat neet. Sien Glück was eerst vullkomen, nadat he all Arv- un Koopburen en Beker Theelbeer inschunken harr.

De Theelacht will 2026 en Theel-Book herutgeven. Arv- un Koopburen sünd upropen, för dat Book een of twee Texten to schrieven, de mit de Theelacht to doon hebben, en Beleevsel of wat de Theelacht för hum bedüdd, en Geschicht of en Gedicht. De Titel van dat Book sall wesen „Theelacht to  Nörden – en Stee van Stüüt un Stöön för de oostfreeske Taal“. Carl-Heinz Dirks ut Emden un Hans-Hermann Briese ut Nörden sallen de Texten bewarken.

As de Büdel todaan was un de Regularien oflopen, wurr na de Oll Wennst wat vör dat open Heerdfüür vordragen.

Middeweek: Siet 25 Jahr gaff dat maal weer Musik in de Theelkamer. Pädagoge Remmer Kruse mit sien Ukulele sung  Middeweek mit de Keerls „Hey! Jo! Smiet dien Bulldog an“. Lüü, de an ’t olle Raadhuus vörbilepen, mögen villicht docht hebben, Theelacht was duun. Man was neet!

Fredag: Dietmar Spekker leesde en Wiehnachtgeschicht vör, in de de Stadtdener Harald Saathoff de Hauptrull spöölde.

Von Briese was Prosa („Wiehnachten an Boord“) un Lyrik („Bethlehem daarna“) to hören.

HHB

12.12.2025