Siet Määrt 2025 is dat Amt as Theelachter för de Hover un Trimser Theele neet besett.  De Kandidaat mutt in beide Theelen bearvt wesen. Kören düren blot Arvburen in de beid Theelen. Dat gaff blot en Kandidaat: Hans-Günter Rühaak. He  is al siet de Ofrekens-Versammeln to Johanni Baptist 2022 Vize-Syndicus un steiht de Syndicus Holger Alts an de Sied. Rühaak is Theelachter van de nahste Generation. De Theelachters in Amt un Würden sünd 91, 85 un 77 Jahr old. De Wahl was eenhellig. Na de Wahl gaff dat en Laudatio in Riemen up Platt ut de Feer van de Berichterstatter:

„De Leden van de Theelen, Utschuss un de mit Delen, de wullen bi de Wahlen as Theelachter Di halen. Se wussen, Du büst ehrelk, Du findst de Theelacht herelk, Du giffst vööl Tied daarin, na Theelacht steiht Dien Sinn. Se wussen, Du büst flietig un neet minner düchtig, büst, as ’t mutt, mannhaftig un ok alltied wahrachtig. De Theelacht as Verplichten, as „Blase van Histoorje“,  dat Gode un Quade sichten, as Redjeve richten. Wi wünsken Di alltied en gode redelk Hand. Bliev munter an uns Sied, Stahfast in ’t Nörder Land.

Daarna gung dat mit swarte Packje an un mit Zylinder up d’ Kopp eenmaal over de Beestmarkt na de Theelachts-Smuus up Nögen van de neje Theelachter.

HHB